కలవరమాయే మదిలో

నేనేమి చేసాను నేరం ...

2009-12-31T02:18:00.000-08:00

నిన్న కన్నడ నటుడు విష్ణువర్ధన్ చనిపోయారు. అయన సినిమాలు ఒకటి అరా నేను చూసాను. నాకు భాదగానే ఉంది. షాప్ లను మూయించారు సరే ... తెరిచినా షాప్ అద్దాలను పగుల కొట్టారు... ఇలా ATM లను పగుల కొట్టటం..

హంపి

2009-05-23T10:54:00.000-07:00

పంచముఖి ఆంజనేయస్వామి గుడి

మంత్రాలయం రాఘవేంద్రస్వామి

హంపి విరూపాక్షాలయం గోపురం ఇది 165 అడుగుల ఎత్తుతో 11 అంతస్తులతో ఉంటుంది.

విరూపాక్ష దేవాలయంలో ఉన్న నంది విగ్రహం. ఇది ధ్వంసం చేయబడ్డంతో దీని స్థానం లో కొత్తది ప్రతిష్టించారంట.

కడళే కాయి గణేష 18 అడుగులు ఉన్న ఏకరాతి గణపయ్య విగ్రహం

బడవ లింగం 12 అడుగులు ఉన్న శివలింగం

22 అడుగులు ఉన్న ఉగ్రనరసింహుని విగ్రహం

పాతాళేశ్వరాలయం. దీని పైకప్పు భూమట్టానికి సమానంగా ఉంటుంది. లోపల శివలింగం ఉంది.

గజశాల

విఠలదేవాలయం గోపురం లోపలి వైపు నుండి

రాతి రథం

ఆంజనేయ పర్వతం
ఇది ఆంజనేయుడి జన్మస్థానం. 500 పైగా ఉన్న మెట్లు ద్వారా పైకి చేరుకుంటే గుడి ఉంది. ఇంకా అక్కడినుంచి చూస్తే పరిసరాలు చాలా అందంగా కనబడుతాయి .

వృత్తంలోనిది విఠల ఆలయం

ఆంజనేయ పర్వతం పైన ఉన్న శివాలయం

రాముడు ఇక్కడ నిలబడి వాలి పైకి బాణం సంధించాడంట.

విరూపాపురగడ్డ (తుంగభద్ర అవతలి ఒడ్డు ) నుంచి విరూపాక్ష ఆలయం గోపురాలు

హొస్పేట్ నుంచి హంపి వైపు వెళ్ళేటప్పుడు కుడి వైపు వచ్చే సాయి బాబ మందిరం

గోళీలాడుకుందాం రా...

2009-04-08T23:00:00.000-07:00

గోళీ ఈ మాట వింటేనే ఒళ్ళు పులకరిస్తుంది. రోమాలు నిక్క బొడుచుకుంటాయి. ఇంకా ఆది సినిమాలో ఎన్.టి.ఆర్ సీమ లో నీళ్ళు తాగితే గొంతు ఎర్రగా మారి పౌరుషం తన్నుక వస్తుంది చూడండి అలా, పొందూరు ఖద్దరు వేసిన బాలయ్యలా గోళీ అంటే నాకు ఏదేదో అయిపోతుంది. గోళీలు కనుక ఒలింపిక్స్ లో పెట్టి ఉంటే First to last అన్నిమెడల్స్ నేను మా ఫణి గాడు క్లీన్ స్వీప్ చెసేవాళ్ళం. కాని విదేశీ కుట్ర ల మూలంగా ముఖ్యంగా CIA, KGB, ISI ల కుట్ర ఫలితంగా మా టాలెంట్ అణచి వేయబడింది. లేదంటే 90ల్లోనే ఇండియాకు గోళీల్లొ గోల్డ్ తెచ్చేవాళ్ళం.

నేను ఫణి ఒకే వీధిలో ఎదురెదురు ఇళ్ళలో ఉండేవాళ్ళం. ఇద్దరం 4 తరగతి ఒకే స్కూల్ లో చదివేవాళ్ళం. మాకు ఇంకో పేరు కూడా(భాషాలో లా ) గోళీ బ్రదర్స్. చుట్టు పక్కల 4 , 5 వీధుల్లో ఎవరికి మాకు ఉన్నంత ప్రావీణ్యం గోళీల్లో ఉండేది కాదు. రెండు గోళీ లతో వెళితే 200 గోళీ లతో వచ్చేవాళ్ళం. ఇంటికి తెచ్చి వెదురు బుట్టలో వెసేవాళ్ళం. ఒక square గీసి అందులో గోళీ లు పెట్టి, అక్కడనుంచి గోళీ విసిరితే ఎవరిది దగ్గర పడితే వాళ్ళే ముందు square లో ఉన్న గోళీ బయటకు వచ్చేలా ఒక్క సారిగా గోళీతో కొట్టాలి. దీని పేరు డిం. ఇంకా గోళీలు అన్ని వరుసగా పెట్టి ఎదుటివాడు చెప్పిన గోళీ ఆ వరుసలోనిది కొట్టాలి. కొడితే ఆ వరుసలోని గోళీలంతా వాడికే. దీని పేరు సెట్. సెట్ అయిన, డిం అయిన ఇరగదీసేవాళ్ళం.

అవి మా గోళీ సామ్రాజ్యం విస్తరిస్తున్న రోజులు. ఒక రోజు మా వీధిలోకి కొత్తగా ఒక ఫ్యామిలి వచ్చారు. వాళ్ళకో అమ్మాయి. పేరు ధరణి. ఈ అమ్మాయి 5 తరగతి. మాకన్న సంవత్సరం పెద్ద. ఎప్పుడు రెండు జడలు వేసుకొనేది. ఒకరోజు సాయంత్రం బాగా తిని నేను ఫణి గాడు వీధిలోకి వచ్చి గోళీలు ఇరగదీస్తున్నం. అంతలో ధరణి వచ్చి రేయ్ నేను వస్తా అంది. రావడంతోనే రేయ్ అనడంతో మా ఇగో కాస్త దెబ్బతింది. అయిన సర్దుకొని రా అన్నాం. డిం ఆడాం 5 గోళీ లు కొట్టేసింది, సెట్ ఆడాం 10 పోయింది. అలా మా గోళీ లు అన్ని కొట్టేసి తన ఫ్రాక్ జేబులు నింపుకుంది. మొదటసారి ఓటమి. గోళీ బ్రదర్స్ ఓడిపోయారు. వీధి నివ్వెరపోయింది. ఓటమిని జీర్ణించుకోవడానికి ఓ వారం పట్టింది. తరువాత రోజు అలాగే ఏ ఆట అయిన మా గోళీ లు ఖాళి. ఇంట్లోకి వచ్చి బుట్టలో గోళీలు వేసి పోయేవాళ్ళం, ప్రతి పది నిమిషాలకు ఒకసారి వచ్చి బుట్టలోని గోళీలు జేబులో నింపుక వెళ్తున్నాం. ఏంచేసిన ఓడిపోతున్నాం. ఒక వారం గడిచింది. సగం బుట్ట ఖాళీ. మా గౌరవమర్యాదలు మంట కలిసాయి. మేము వెళ్తే 5,6 తరగతుల వాళ్ళు కూడ అన్న అనేవాళ్ళు. అలాంటిది మా పెద్దరికం అటకెక్కింది. మా ఆధిపత్యం అణచి వేయబడింది. అంతకన్న తీవ్రమైంది ఆ అమ్మాయి మమ్మల్ని తిట్టేది. ఫణిని పొట్టోడా అని, నన్ను సన్నోడా అని.

మేమిద్దరం ఆలొచించి ఒక నిర్ణయం తీసుకున్నాం . ఏలాగైన ఈ రోజు దెబ్బ కొట్టాలి అని. మాకు తెలీదు మేమే దెబ్బయిపోతాం అని. ధరణి రా అని పిలిచాం. ఏరా కొత్తగా గోళీలు కొన్నారా అంటూ వచ్చింది, వెళ్ళాం. డిం ఆడాం, సెట్ ఆడాం. లాభం లేదు మళ్ళీ గుండు కొట్టించింది. చివరికి 5 మిగిలాయి. ఈ సారి సెట్ పెట్టాం. అంటే 5 గోళీ లు వరుసగా పెట్టీ చెప్పింది కొట్టాలి. నేను మా ఫణి గాడు మిస్ అయ్యం. చివరికి తన చాన్స్. మూడొది అన్న.. ఠక్కున కొట్టేసింది. అంతే మా ఫణి గాడు left నుంచి కాదు right నుంచి మూడోది అన్నాడు, నేను అవును తప్పు, గోళీ లు మాదే అన్న అంతే... ఒరేయ్ వెధవల్లరా పెట్టింది 5 ఎటునుంచి అయిన మూడోది అదేరా అని తిట్టింది. అంతే ఫణి గాడూ సైగ చేశాడు. నేను వెంటనే ధరణి రెండు జడలు పట్టుకొని కిందకు గట్టిగా గుంజా అంతే భూమి నుంచి మూరడున్న ఫణి గాడు రెండు మూరలు పైకి గాల్లోకి ఎగిరి వీపు మీద ఒకే ఒక గుద్దు గుద్దాడు. అంతే ఢాం.... వి.వి.వినాయక్ సినిమాలో హీరో కొడితే విలన్ కింద పడే లా ధరణి నేలకు కరుచుక పోయింది. గోళీ బ్రదర్సా ..మజాకానా. అంతే మేము ఇంటికి పారిపోయాం.

5 నిమిషాల్లొ యుద్ధం మొదలైంది. ధరణి వాళ్ళమ్మ మా ఇండ్ల మీద యుద్ధం ప్రకటించింది. ఫణి వాళ్ళ అమ్మా, మా అమ్మా సంయుక్తంగా కలిసి దాడిని ఎదుర్కొన్నారు. యుద్ధం తీవ్రం అయింది. మటల్లొ వాడి, వేడి పెరిగింది. వంశాలు వంశాలు మాటల్లొ దొర్లుతున్నాయి. కాసేపటికి సంయుక్త సైన్యం ధాటికి శత్రు సైన్యం తోక ముడిచింది. ధరణి వాళ్ళమ్మ ఇంటికి వెళ్ళింది. అంతే వీళ్ళూ మా వైపు ఉరుముతూ చూసారు. కీడు శంకించి మేము ఇంట్లోకి వెళ్ళి దాక్కున్నాం, అయిన లాభం లేకపోయింది. సోఫా కింద, మంచం కింద, టి.వి స్టాండ్ వెనుక, అటక పైన ఎక్కడ దాక్కున్నా పట్టుకొని విరగదీసారు. కొట్టిన చోట కొట్టకుండా, మా ఒళ్ళు పులిసే వరకు , వాళ్ళ ఒళ్ళు అలిసే వరకు కొట్టారు. తరువాత.. ఇంకో సారి గోళీలు ఆడి గొడవలు తెచ్చారో అయిపోతారు అని వార్నింగ్ ఇచ్చారు. మరుసటి రోజు ఇద్దరం దెబ్బలకు మందు రాసుకుంటు ఆలోచించాం. హఠాత్తుగా ఫణి గాడు రేయి అమ్మా వాళ్ళూ ఏమన్నారు అని అడిగాడు. గోళీలాడి గొడవలు తెస్తే. అన్నా... అయితే మనం బొంగరాలు ఆడుదాం అన్నాడు.
అంతే..

పక్క వీధిలో ఉన్న మురళీ గాడి దగ్గరకు వెళ్ళి, ఒక బొంగరం గురుదక్షిణ గా సమర్పించుకొని రెండు రోజుల పాటు శ్రద్దాసక్తులతో, అకుంటిత దీక్షతో , భయం భక్తులతో బొంగరానికి తాడు చుట్టడం దగ్గరనుంచి, బొంగరాన్ని గాల్లోకి వేసి చేతిలో పట్టడం వరకు అన్ని అస్త్రశస్త్రాల్లో ఆరితేరాం. తరువాత ఏముంది అప్పటి నుంచి 3 బొంగరాలు, 6 గొడవలు గా వర్థిల్లాం. కాని ఈ సారి కూడా మాకు అన్యాయం జరిగింది, ఒలింపిక్స్ లో బొంగరాలు పెట్టలేదు.

మాటల్లేని వేళ An Anthology of Poems

2009-04-06T03:34:00.000-07:00

"ప్రళయాలకు కారకులు
అనాదిగా మనుషులే
బాధితులూ మనుషులే
శత్రువంటూ లేని కాలంలో
ప్రళయాలుండవు
మనసుతో బ్రతికినంత కాలం
మనుషులకు మరణాలుండవు" ఈ లైన్లను చూసి మాటల్లేని వేళ చదవడం మొదలెట్టా. పలమనేరు బాలాజి రాసిన 47 కవితల సంకలనమే ఈ మాటల్లేని వేళ. పొట్టి శ్రీ రాములు తెలుగు విశ్వవిద్యాలయం వారు ఆర్థిక సహాయం చేశారు అని పుస్తకం అట్టపైన ఉండడంతో ఇంకా ఆసక్తి పెరిగింది.

అంత్యక్రియలు అనే కవితలో
'చావుదేముంది
అదొక బహిరంగ కుట్ర
చావంటే
సమస్త అనుబంధాల్నుంచీ
చప్పున
తప్పుకొవటమే కదా'.. అంటూ చావును నిర్వచిస్తూనే,
'ఏ చావైనా నీలో
దుఃఖాన్ని కలిగించలేదంటే..
బహుశా నువ్వప్పటికే
మరణించి ఉంటావు '.... అంటూ నిష్టూరమాడుతాడు.

ఒక శీతాకాలపు సాయంత్రం అనే కవితలో...
'అడుగులు ముందుకు
మనస్సులు వెనక్కూ
లాగుతూనే ఉన్నాయి.
నిజానికి ఖాళీ అయ్యింది ఇల్లు కాదు
మేమే.'
అంటూ ఖాళీ చేసిన ఇంటి విశేషాలు వివరిస్తాడు. సరదాలు, తగాదాలు, పి.పి. కాల్స్, పోస్ట్మేన్, వాచ్ మేన్, ముగ్గులు అలా అన్నింటిని గుర్తుచేసుకుంటాడు.

ఒక అమ్మ మరణం అనే కవితలో
'మనిషి మరణంతో ఏర్పడ్డ ఖాళీలు
మనసున్నంత వరకు వుంటాయేమో' .. అని అనుమానం వెలిబుచ్చుతాడు.

ఇంకా విజన్ అనే కవితలో కష్టాల్లోని రైతును తలచుకుంటూ...
'అతడొక
మందుపాతరని
ముందే తెలుసు
పల్లెకు, నగరానికి
తేడా లేని కాలంలో
తాకట్టు పెట్టి పెట్టీ
అతడికిప్పుడు తలే లేదు
మిగిలిందల్లా
అప్పుల ఆనవాళ్ళే
ఇప్పుడతడు
గుప్పెడు గింజలు, పోగొట్టుకున్న పరపతి,
కాసిన్ని నీళ్ళు, కరెంటు
కావాలంటున్నాడు
పైరు పండితే చాలు
పచ్చదనంతో తల పైకెత్తుతాడు
దేబరించటం కాదు
డిమాండ్ చేస్తున్నాడు
అతడి పరపతి
అతడికి ఇవ్వాల్సిందే
లేదంటే
అతడొక మందుపాతరని
ముందే చెప్పా' అంటూ ముగిస్తాడు.

సృజనను, సృజనాత్మకతను వివరిస్తూ సృజనకారుడు లో
'విధ్వంసం తప్ప
ప్రతిదీ సృజనాత్మకమైనదే' అంటూ ఒకే ముక్కలో తేల్చేస్తాడు.

'ఇండ్లు
ఇండ్ల ముందర ఇండ్లు
ఇండ్ల వెనుక ఇండ్లు
ఇండ్ల పక్కన ఇండ్లు
ఊర్లన్నీ ఇండ్లతో నిండిపోతే
ఇండ్లన్నీ మనుషులతోనే మిగిలిపోతే
తిరుగాడేందుకు, ఆటలాడేందుకు,
మనిషితో మనిషి ఎదురుపడి
ముచ్చట్లాడేందుకు,
కష్టమో, సుఖమో, దుఃఖమో, ఆనందమో
పంచుకునేందుకు వీథులెక్కడ ?' అని వీథి లో ప్రశ్నిస్తూనే...
'నీకోసం ఇండ్లు నిర్మించు
నీకోసం ఊర్లు నిర్మించు
నీలాంటి వాళ్ళకోసం
నీలోని వాళ్ళకోసం
వాళ్ళలోని నీకోసం' అంటూ సమాధాన పరుస్తాడు.

మనిషితనం అన్న కవితలో
'మనిషితనాన్ని చూడాలంటే
మనం పల్లెటూరికి నడవాల్సిందే' అనడం... ఎందుకో మరి నేను పూర్తిగా ఏకీభవించలేకపోయా.
మానవుడు దానవుడైన వేళ, మానవత్వం మంట కలిస్తే, పల్లె అయిన పట్టణం అయిన ఒకటే కదా !

ఇక చివరగా మాటల్లేని వేళ అనే కవితలో
'మాట
ఒక చలన సూత్రం
ఒక వారధి, ఒక చర్య లేదా
ఒక వ్యూహం, ఒక మాయ' అని సూత్రీకరిస్తాడు.
'మనసున్న వాళ్ళతోనే మాట్లాడు
మనసున్న వాళ్ళతోటే జీవించు
మాటలే జీవన సౌరభాలు' అంటూ ముగిస్తాడు. మొత్తానికి నాకు ఈ పుస్తకం నచ్చింది :)

పుస్తకం : మాటల్లేని వేళ
రచయిత : పలమనేరు బాలాజి
వెల : రు.25
E-mail: knpalamanerbalaji@yahoo.co.in

లేపాక్షి అందాలు

2009-03-08T22:30:00.000-07:00

లేపాక్షి అనగానే మనకు ఠక్కున గుర్తుకు వచ్చేది లేపాక్షి నోట్స్ లు ఇంకా పెద్ద నంది. అప్పట్లో 200 పేజీల నోటు పుస్తకం 6 రూపాయలకు కొన్నట్లు గుర్తు మరి ఇప్పుడు ఎంతో ? అసలు ప్రింట్ అవుతోందో లేదో కూడా తెలీదు. ప్రపంచంలో పెద్ద నంది ఇది. లేపాక్షి వీరభద్రాలయం కూర్మ ఆకారం లో ఉన్న రాతి గుట్ట పైన 5 ఎకరాలలో నిర్మించబడ్డ ఆలయం ఇది. 1538 లో విజయనగర రాజుల కోశాధికారి విరూపణ్ణ నిర్మించినట్టుగా చారిత్రక ఆధరాలు ఉన్నాయి.

నాట్య మంటపం- నాట్య మంటపం లో మొత్తం 70 స్తంభాలున్నాయి. ఇక్కడ రంభ, నారదుడు, తుంబురుడు మొదలైన వారి శిల్పాలు చెక్కి ఉన్నారు. ఆధారం లేని స్తంభం.ఇది నాట్య మంటపంలో ఉంది. బ్రిటీష్ ఇంజనీర్లు కొంతమంది ఈ స్తంభం యొక్క రహస్యంకనుగొనాలి అని దీన్ని జరిపే ప్రయత్నం చేసారంట మొత్తం మంటపంలోని మిగిలిన స్తంభాలు కదిలేసరికి మొత్తం మంటంపం కూలుతుందేమో అని వదిలేసారంట. అలా దీనికి ఆధారం లేనప్పటికి మొత్తం మంటపానికి ఇదే ఆధారం అన్నమాట. ఇలా జరపడం మూలంగా కదిలిన మరి కొన్ని స్తంభాలను మనం చూడ వచ్చు. ఇక నాట్య మంటపం పై కప్పుకు ఉన్న వర్ణచిత్రాలు . ఇవి పూర్తిగా సహజ వర్ణాలతో వేయబడ్డవి. చాలావరకు చెక్కు చెదరకుండా ఆశ్చర్యాన్ని కలుగచేస్తాయి.
ఎటువైపు నుంచి చూసిన మనల్నే చూస్తున్నట్టు ఉండే శ్రీ కృష్ణుడి చిత్రం.

ఏడు శిరస్సుల నాగు ఛత్రంగా ఉన్న మహా లింగం . నంది దగ్గర నుంచి చూస్తే ఈ నాగు శిరస్సు కనపడుతుంది.

ఆలయం నిర్మాణం ప్రారంభించినప్పుడు మొదట ఈ వినాయకుడితో ప్రారంభించారంట.
అచ్యుతరాయలు కాలంలో విరూపణ్ణ నిర్మించిన గుడి ఇది. అచ్యుతరాయలు తరువాత ఆయన అల్లుడు రాజు అవుతాడు. తప్పుడు సలహాల మూలంగా,
విరూపణ్ణ కోశాగారం ఖాళీ చేసాడు అన్న అభియోగం పై ఆయన్ను శిక్షించాలి అనుకుంటాడు రాజు. ఈ విషయం తెలిసిన విరూపణ్ణ తనకు తానుగా తన కళ్ళను తీసి ఆవరణలో ఉన్న గోడకు విసురుతాడు . గోడపై ఆ భాగంలో చారలు ఏర్పడ్డాయి . ఆయన భక్తికి ఇది సాక్షి గా చెప్పుకుంటారు. ఈ సంఘటన జరగటంతో అప్పుడు నిర్మిస్త్తున్న కల్యాణమంటపం సగంలో నిలిచిపోయింది. ఇది అసంపూర్తి కల్యాణ మంటపం. దీనికి కప్పు ఉండదు. ఈ కల్యాణ మంటపంలో శివుడికి పార్వతికి కల్యాణం జరిగే ఘట్టాలను శిల్పాలుగా చెక్కారు. అలంకారం అయిన పెళ్ళి కొడుకు , పార్వతి చేతి 4 వేళ్ళు పట్టు కున్న శివుడు, గమనించ వచ్చు . నాలుగు వేదాలకు, దిక్కులకు ప్రతీకగా ఇలా చెక్కారంట .

అప్పటి గ్రాఫిక్స్... ఈ బొమ్మ ప్రత్యేకత ఏంటంటే... 3 తలలు ఉన్న ఒక ఆవు బొమ్మ. రెండు తలలు మూసి ఒక్కో తలను చూసినప్పుడు ఇందులో వరుసగా మేత మేస్తున్న ఆవు, దూడకు పాలు ఇస్తున్న ఆవు, తల ఎత్తి చూస్తున్న ఆవు అలా 3 రూపాలు కనపడుతాయి.

లేపాక్షి డిజైన్స్... ఈ కల్యాణ మండపం ప్రక్కనే రాతి స్తంభాల పైన డిజైన్స్ ఉంటాయి . మొత్తం 36 స్తంభాలు. ఒక్కో స్తంభం పైన 4. అలా మొత్తం 144 డిజైన్స్ ఉన్నాయి. రిపీట్ కాకుండా చెక్కారు.

రావణుడితో జటాయువు యుద్ధం చేసి నేలకొరిగిన ప్రాంతం ఇది. రాముడు క్షతగాత్రుడు అయిన జటాయువును ఉద్దేశించి లే పక్షి అన్నాడంట కాలాంతరం లో ఇది లేపాక్షి గా మార్పు చెందింది. ఆ సమయంలో రాముడు ప్రతిష్టించిన లింగం రామ లింగం గా పూజలు అందుకొంటొంది.

సీతమ్మ తల్లి పాదం ఉంది. బొటను వేలు ప్రాంతం నుంచి నీటి ధార చుక్క చుక్కగా ఎల్లప్పుడు ఉంటుంది.

ఆలయ ధ్వజ స్తంభం , గోపురం

పేరు @ పేరు

2009-02-19T22:13:00.000-08:00

మాస్టర్ బ్లాస్టర్ అంటే మనకు ఠక్కున గుర్తొచ్చేది సచిన్. అలాగే దాదా అంటే గంగూలీ, బిగ్ బి అంటే అమితాబ్, బాలీవుడ్ బాద్షా అంటే షారుఖ్ వెంట వెంటనే గుర్తొస్తారు. ఆ విధంగా మన వాళ్ళకు పేర్లు ఉంటే ఎలా ఉంటుంది బహుసా ఇలా ఉంటుందేమో....

1.మారిన మనిషి, మహా నాయకుడు నారా చంద్రబాబు
2.కోతల రాయుడు, వాగ్ధానాల వీరుడు వై.ఎస్ రాజశేఖర్ రెడ్డి
3.మార్పు మాంత్రికుడు, మెగా నాయకుడు చిరంజీవి
4.బొంద వీరుడు కె.సి.ఆర్
5.దండయాత్ర దురంధరుడు మంద క్రిష్ణ
6.లెజండ్రీ కింగ్ మోహన్ బాబు
7.కాకలు తీరిన నాయకుడు వెంకటస్వామి
8.ఆశుకవితా పితా మహుడు మారెప్ప
9.Jr. పులి Jr. N.T.R
10.Sr. పులి బాలయ్య
11.బెబ్బులి హరిక్రిష్ణ
12.చిట్టి పులులు కళ్యాణ్ రాం, తరకరత్న
13.గవర్నర్ సత్తెన్న ఎం.ఎస్.ఆర్
14.మేచ్ ఫిక్సర్ అమర్ సింగ్ ( ఇది క్రికెట్ మేచ్ కాదు ఇంకోరకమైన 'మేచ్ ')
15.కూరలో కరివేపాకు రాజశేఖర్
16.నమ్మిన బంటు సూరీడు
17.మాటల మరాఠీ వెంకయ్య నాయుడు
18.బూతు కోవిదుడు పోసాని కృష్ణ మురళి
19.రాజకీయ దృతరాష్ట్రుడు మన్మోహన్
20.ఓ మంచి బామ్మర్ది అల్లు అరవింద్
21.వసూల్ రాజ కె.వి.పి రామచంద్ర రావు
22.సొగ్గాడు రాహుల్
23.ప్రిన్స్ ఆఫ్ ఆంధ్రా జగన్మోహన్ రెడ్డి
24.రాజకీయ నిపుణుడు ( అని ఈయన ఫీలింగ్ ) రోశయ్య
25.లేఖల రాముడు దత్తాత్రేయ
26.దైవ పుత్రుడు Br. అనిల్ కుమార్

చివరిది

27.గంజాయి వనంలో తులసి మొక్క జె.పి

తెలుగు ప్రజా సమితి

2009-02-11T00:57:00.000-08:00

రాబోవు ఎన్నికలలో ప్రజాస్వామ్యాన్ని కాపాడ్డానికి, అవినీతిని అంతం చెయ్యడానికి ప్రజా సంక్షేమం కోసం సమన్యాయం నినాదంగా తెప్రస ఏర్పడింది. గాంక్రెస్, తెలుగునాడు, ప్రజా రాష్ట్రానికి ప్రత్యామ్నాయంగా ఇది ఏర్పాటు చెయ్యబడింది. మహా,మెగా కూటములు దీని ముందు మూసీ లో కలిసి పోతాయి. మేము 20 హామీలను ప్రజలకు ఇస్తున్నాం వీటిని ఖచ్చితంగా అమలు చేస్తాం అని కూడా హామీ ఇస్తున్నాం.

1. వ్యాపార వర్గాలకు, పరిశ్రమలకు, రైతులకు, దిగువ మధ్య తరగతి, పై మధ్య తరగతి పేదలకు, ధనికులకు, ప్రభుత్వ ఉద్యోగులకు, ప్రవేటు ఉద్యోగులకు, నిరుద్యోగులకు ఉచిత విద్యుత్.

2.తెలంగాణ, గ్రేటర్ రాయలసీమ,ఆంధ్ర రాష్ట్రాలు ఇవ్వాలి అని శాసన సభలో బిల్లు పెడతాం.

3.జిల్లాకు ఒక హైకోర్టు , వీలైతే రెండు మూడు జిల్లాలకు కలిపి ఒక సుప్రీం కోర్టు ఏర్పాటుచేస్తాం.

4.ప్రతి మండలానికి ఒక విశ్వవిద్యాలయం ఏర్పాటు చేస్తాం. ఇందులో సామాజిక న్యాయం పాటిస్తాం.

5.నదులు, వాగులు, వంకలు ఉన్నట్లైతే వాటిమీద నాగార్జునసాగర్ లాంటి ప్రాజక్ట్లు కడతాం. నదులు, వాగులు, వంకలు లేనట్లైతే ముందు వాటిని తవ్వి వాటిమీద ప్రాజక్ట్లు కడతాం. దీనికోసం ధనయజ్ఞం అన్న పథకం ప్రారంభిస్తున్నాం.

6.రాజకీయ, సాంస్కృతిక, సాంఘీక , ప్రాంతీయ అసమానతలు రూపుమాపుతాం. అందులో భాగంగా చార్మినార్ ను కర్నూల్ కు, కొండారెడ్డి బురుజును విశాఖకు, రామక్రిష్ణ బీచ్ ను హైదరాబాదుకు తరలిస్తాం.

7.ప్రతి మున్సిపాలిటీకి ఒక విమానాశ్రయం, ఒక రైల్వే స్టేషన్, ఒక ఓడరేవు కడతాం.

8.పల్లెలలోని సారాను నగరాలకు, నగరాలలోని పబ్ లను పల్లెసీమలకు పరిచయంచేస్తాం. (శ్రీరామసేనను నిషేదిస్తాం).

9.సాక్షి కొన్నవారికి ఈనాడు , ఈనాడు కొన్నవారికి సాక్షి ఉచితంగా పంపిణీ చేస్తాం.

10. స్కూటర్లకు, కార్లకు, బస్సులకు , ఆటోలకు, లారీలకు పెట్రోలు డీజిలు ఉచితం.సైకిలుకు గాలి ఉచితం

11.గృహ అవసరాలకు ఒక సిలిండర్ కొంటే ఇంకోటి ఉచితం. వాణిజ్య అవసరాలకు ఒకటి కొంటే రెండు ఉచితం.

12.విద్యార్థులకు,మహిళలకు, ఉద్యోగులకు,నిరుద్యోగులకు,రిటైర్డ్ ఉద్యోగులకు, రెటైర్డ్ నిరుద్యోగులకు ఉచిత ప్రయాణ సౌకర్యం.

13.మసీదుల్లో శుక్రవారం, చర్చీల్లో ఆదివారం, గుళ్ళలో గురువారం ఉచిత ప్రసాదం ప్రభుత్వం తరపున పంపిణీ చేస్తాం.

14.ప్రతి ఇంట్లో ఒకరికి ఉచిత హృద్రోగ శస్త్ర చికిత్సను అనారోగ్యశ్రీ పథకం కింద ఖచ్చితంగా అమలు చేస్తాం.

15.మైనార్టీ, అల్ప వర్గాలకోసం హైదరాబాదులో మక్కాను, వాటికన్ సిటీని నిర్మిస్తాం.

16. ప్రతి వారం లో ఒక సారి వీలైతే రెండు సార్లు వర్షం పడేవిధంగా చేస్తాం. పగటి ఉష్ణోగ్రతలు 30 డిగ్రీల కంటే పెరగకుండా చూస్తాం . ఎలా అంటే మాది దేవుడి పాలన.

17.ఆర్థిక పరమైన భధ్రత ప్రతి ఒకరికి కల్పిస్తాం. అందుకోసం ఆర్థికశ్రీ అనే పథకం కింద కుటుంబంలో ఒకరికి స్విస్ బ్యాంకు లో అకౌంటు ప్రభుత్వం తరపున ప్రారంభిస్తాం.

18.పర్యాటక రంగం అభివృధ్ధికోసం ప్రతి ఊరిలో ఒక నైట్ క్లబ్ ఏర్పాటుచేస్తాం. ఇందులో సెలెబ్రిటీగా, లెజెండ్ గా ముమైత్, మల్లికా, మలైకా లు పాల్గొంటారు.

19.పుణ్యభూమి పథకం కింద డ్వాక్రా మహిళలకు, కాజీవ్ యువశక్తి గ్రూపులకు ఒక విమానం ఉచితంగా ఇస్తాం.

20. పైన పేర్కోన్న హామీలను ఖచ్చితంగా అమలు చేస్తాం అని హామీ ఇస్తున్నాం.

జై తె ప్ర స జై జై తె ప్ర స

కొత్త సంవత్సరంలో పాత కోరికలు

2009-01-09T04:48:00.000-08:00

2008 పోయి 2009 వచ్చింది,చూస్తుంటేనే 10 రోజులు అయిపొవస్తోంది. ఈ కొత్త సంవత్సరంలోనైన నా పాత కోరికలు మరియు కొత్తవి కలిసి నెరవేరాలి అని ఇప్పుడే బనశంకరి అమ్మవారికి మొక్కుకొని వస్తున్నా !ఇంతకీ నీ సోది ఏంటీ అంటారా ? ఇదిగో నా చిట్టా ...

1. సచిన్ సెంచరీ కొట్టకపోయిన పర్లేదు కాని పాంటింగ్ ప్రతి టెస్ట్ లోనూ అదీ ప్రతి ఇన్నింగ్స్ లోను డకవుట్ అవ్వాలి(వీలైతే టీం నుండి అవుట్).

2.జలయజ్ఞం ప్రాజెక్ట్లు అన్ని 2009 లోనే పూర్తి అయిపోవాలి. ఒక్క దానికి కూడ గండి పడకూడదు (ఈ విషయంలో బనశంకరి అమ్మవారు కరుణ చూపిస్తారు).

3.ఎం.ఎస్.ఆర్ కు గవర్నర్ గిరి రావాలి( ఈ విషయంలో వై.ఎస్.ఆర్ కరుణ చూపాలి).

4.ముమైత్, రాఖీ, మలైకా లను కంచి పట్టు చీరల ఏడ్ లో చూడాలి.

5.రాహుల్ గాంధీ కి పెళ్ళి అయినట్టు కనీసం నాకు కల అయిన రావాలి.

6. శివరాజ్ కుమార్ (కన్నడ రాజ్ కుమార్ పెద్ద కొడుకు ) హీరోగా , ఎంజలీన హీరోయిన్ గా స్పీల్ బర్గ్ డైరెక్షన్ లో డిస్నీ వాళ్ళు సినిమా తీయాలి.

7.చిరంజీవి మార్పు అంటే ఏంటో చెప్పాలి.

8.సల్మాన్ కత్రినాని , సైఫ్ కరీనాని ఈ సంవత్సరం అయిన పెళ్ళి చేసుకోవాలి.

9.పూరి సినిమలో హీరో , హీరోయిన్ తిట్టుకోకూడదు. తేజ సినిమలో టీనేజ్ లవ్ ఉండకూడదు.

10. చక్రి, రమణ గోగుల, దేవి శ్రీ ప్రసాద్ సినిమాలకు సంగీత దర్శకత్వం మాత్రం చెయ్యాలి. ఏ సినిమాలోను గొంతు విప్పకూడదు. (చివరికి కోరస్ లో కూడ )

11.వెలుతురులో వర్మ సినిమా తీయాలి అది నేను ఒక్కడిని థియేటర్ లో చూడాలి.

12. కె.సి.ఆర్ కు కాంగ్రెస్ కు , పి.ఆర్.పి కి టి.డి.పి కి పొత్తు కుదరాలి.

13. పరిటాల , ఆయేషా కేసులు తేలాలి.

14.నేను రాసే ఇలాంటి ప్రతి చెత్త పోస్ట్ కు 100 కామెంట్లు రావాలి.

క్యూటీస్ --- నా గుండు కథ

2008-12-30T09:32:00.000-08:00

బట్టతల మీద మురళి గారు, మీనాక్షి రాసారు, చదివా హాయిగా నవ్వుకున్నా. కాని ముందు ముందు ఆ బట్టతలే నాకు సమస్య అవుతుంది అనుకోలేదు. అదేం పాపం చేసానో ... బహుసా బట్టతల ఉన్న వాళ్ళని చూసి నవ్వానేమో .. ఏ బట్టతల మహాత్ముడు శపించాడో కాని బట్టతల అనకొండలా వచ్చి చుట్టుకుంది. అంటే ఇప్పుడు నాకు బట్టతల ఏంలేదు. ఇంకో 2 సంవత్సరాలు రాదు కూడ ..కాని ఇంతలో...........

ఫణి (ఓ మంచి రూమ్మెట్) కి అర్జంట్ గా తల మీద జుట్టు కావాలి అని కోరిక వచ్చింది అదే నా చావుకొచ్చింది. వీడి తల FOOTBALL లా, నీళ్ళు గడ్డి రెండు లేని చెరువులా, థార్ ఎడారిలా, GLOBEలా నున్నగా ఉంటుంది. వీడికి ఎవరిచ్చారో కాని "క్యూటిస్" అడ్రస్ ఇచ్చారు. అక్కడికి వెళ్ళావంటే తల నిగ నిగ లాడుతుంది అన్నారంట. అంతే వచ్చి నా ప్రాణం తీశాడు. ఫోన్ చేస్తే 1 month తరువాత ఒక శనివారం కి appointment ఫిక్స్ చేసారు. ఆ రోజు వెళ్ళి చూస్తే అక్కడ ... !

ఏ మగాడిని చూసిన
ఏముంది గర్వకారణం
పురుష జాతి సమస్తం
బట్టతల పరాయణత్వం

ఫస్ట్ ఫ్లోర్ లో క్లినిక్ ఉంటే ఇరుకైన దారిలో అంతా బట్ట తల వీరులే. ఇందులో ఇంకో గమ్మత్తు ఏంటంటే సగానికి సగం మంది తెలుగు వారే !

చిన్న రూంలో ఇసుకవేస్తే రాలనంత మంది జనం మధ్యలో గంట సేపు వేచి చూశాక డాక్టర్ ని కలిసాం. ఆయన మావాడి తలను GLOBE తిప్పినట్టు తిప్పాడు. బహుసా శ్రీలంకను వెతికాడేమో..దొరకనట్టుంది. తరువాత రెండు వేళ్ళతో వాడి తలపైన ఉన్న 4 వెంట్రుకలలో 2 పీకేసాడు, age అడిగాడు, చివరగా ఒకటి తేల్చాడు. స్టార్టింగ్ స్టేజ్ లో ఉంది ట్రీట్మెంట్ చెయ్యొచ్చు. మొదట ఈ మెడిసన్ 1 month వాడండి అని tablets, shampoo ఇచ్చాడు. నాకు ఒకటే డౌట్. భూతద్దంతో వెతికిన 100 వెంట్రుకలుండవు మావాడి తల మీద మరి ఇది ఎట్టా స్టార్టింగ్ స్టేజ్ అయిందబ్బా ! మళ్ళి అన్నాడు 1 month తరువాత వస్తే బెటర్మెంట్ ఉంటే వేరే ట్రీట్మెంట్ చేద్దాం అన్నాడు. కమ్యునిస్టులతో పొత్తు కుదిరిన చంద్రబాబు లా మావాడు ఎగిరి గంతేశాడు.

అలా అలా 1 month అయ్యింది. మళ్ళి అపాయింట్మెంట్ ఫిక్స్ అయింది. ఈ సారి బయలుదేరుతూ ఉంటే నా ఎడం కన్ను అదిరింది. పట్టించుకోలేదు. రూము బయట బైక్ స్టార్ట్ చేసి ఇలా వచ్చాం, నల్ల పిల్లి అలా అడ్డమొచ్చింది. నేను వాడితో వద్దురా శకునం బాలేదు అన్నా, అంతే వాడు అంత ఎత్తున ఎగిరి నువ్వు ఆ పిల్లి నా మీద కుట్ర పన్నారు అన్నాడు. ఇక లాభం లేదు అని బైక్ క్యూటీస్ వరకు లాగించేసా. ఈసారి GLOBE ని డాక్టర్ మళ్ళీ పరీక్షించాడు. ఆస్ట్రేలియా వెతికాడేమో కనపడ్డట్టుంది నవ్వాడు. మావాడి వైపు చూసి మెడిసన్ పనిచేస్తోంది కాకపోతే మీరు గుండు కొట్టించి, ఆయింట్మెంట్ ఇస్తా దాన్ని తల మీద నేను చెప్పినట్టు(paper మీద U, V, W రాసి ఆ విధంగా గుండు మీద మసాజ్ ) అప్లై చేస్తే 100% రిసల్ట్ ఉంటుంది అన్నాడు. వెంటనే నేను "సార్ ఇక గుండు ఎందుకు ఇది ఆల్రెడీ గుండే గా" అన్నా అంతే ఫ్లాప్ సినిమా తీసిన ప్రొడ్యూసర్ లా మావాడు, హిట్ సినిమా తీసిన డైరెక్టర్ లా డాక్టర్ ఫేస్ పెట్టారు.

బయటకు వస్తే మావాడు నాకు టెండర్ పెట్టేసాడు. నేను ఒకడే గుండు కోడితే డౌట్ వస్తుంది (ఇది ఏదో I.S.I సీక్రెట్ లా) నువ్వు నేను తిరుమల పోయి గుండు కొట్టిద్దాం పుణ్యం, జుట్టు రెండూ వస్తాయి అన్నాడు. నేను కుదరదు అంటే నా సెంటిమెంట్ మీద దెబ్బ కొట్టడం మొదలెట్టాడు. రేయ్ నువ్వు సచిన్ 37 సెంచురీ కొట్టినప్పుడు తిరుమల కొచ్చి గుండు కొడతా అన్నావు 41 కూడ అయింది, కొట్టించుకో లేదు అంటే పాంటింగ్ సెంచురీ మీద సెంచురీ కొడతాడు నీ ఇష్టం అన్నాడు. ఆ !!! సచిన్ డకౌట్ అయిన పర్లేదు కాని పాంటింగ్ సెంచురీ కొట్టకూడదు. ఇంకేం చేస్తాం........

జై వెంకటరమణ గోవిందా హరి గోవింద...

కట్ చేస్తే మర్నాడు గుండుతో దిగాం రూం లోకి .

నేను రోజు తెల్లారి లేచేటప్పటికి మావాడు తల స్నానం చేసి గుండు మీద ఎంచక్కా A,B,C,D లు దిద్దుతూ ఉంటాడు ఆయింట్మెంటుతో.

ఏంటో మరి !!!

టీనేజ్ లవ్ లేని తేజ సినిమ
Mr.Bean లేని POOGO
శశికళ తోడు లేని జయలలిత
గండి పడని జలయజ్ఞం ప్రాజెక్ట్
ఠాక్రే లేని ముంబాయి
అవినీతి లేని ఆంధ్రప్రదేశ్
అధిష్టానం లేని కాంగ్రెస్
నిగ నిగ లాడే జుట్టుతో మా ఫణి... జరుగుతాయంటారా !

అక్షరం

2008-11-09T05:03:00.000-08:00

అక్షరం
ఒక విస్పోటనం
అక్షరం
ఒక విప్లవం
అది ఒకప్పటి మాట
అక్షరం
వంచకుల చేతి అస్త్రం
అక్షరం
రాజకీయం చేతిలో బంధి
ఇది నేటి మాట
5 కాని 9 కాని
మరేదైనా కాని
నవ సమాజం కాదు ముఖ్యం
సమ సమాజం కాదు లక్ష్యం
హీరోయిన్ దుస్తులు -హీరోల శిస్తులు
ధనవంతుల ఆస్తులు - పార్టీల పొత్తులు
సంచలనాల స్క్రోలింగులు - ప్రోగ్రాంల రేటింగులు
ఎప్పుడైనా ఇవే ...ఎక్కడైనా ఇవే
అక్షరాలను పదాలుగా
పదాలను వాక్యాలుగా
వాక్యాలను కథనాలుగా మార్చి
నీతికి అవినీతికి
మధ్య గల గీతను చెరిపేస్తూ
సాగుతోంది అక్షర ప్రయాణం
కులాలు, మతాలు
ఆవేశాలు, ఆదేశాలు
ఆక్రోశాలు, ఆక్షేపణలు
అక్షరానికి కాదు అవరోధాలు
రండి ...
సంకెళ్ళు తెంచుదాం..
అక్షరాన్ని
మానవత్వంతో నడిపిద్దాం

జై బోలో ఏ.పి.ఎస్.ఆర్.టి.సి కి

2008-10-23T05:51:00.000-07:00

రెడ్ కలర్ లో ఉండే ఏ.పి.ఎస్.ఆర్.టి.సి బస్సులు అంటే నాకు చిన్నప్పుడు నుండి చాలా ఇష్టం. ఇప్పుడు కలర్ మార్చారు లెండి. ఏదైనా ఊరికి వెళ్ళాలి అంటే చిన్నప్పుడు పట్టు బట్టి మరీ ఇంట్లో వాళ్ళను ఆర్.టి.సి బస్సులు ఏక్కించేవాడిని. లేదంటే మరి బస్టాండ్ అంతా పొర్లి పొర్లి ఏడ్చేవాడిని. ఇంతకీ ఆర్.టి.సి అంటే అంత ప్రేమ ఎందుకు అంటారా ? మరేంలేదు, ప్రవేటు బస్సులో ఒక్క గంట పట్టే ప్రయాణం ఆర్.టి.సి లో 2 గంటలు పడుతుంది. ఎక్కువసేపు బస్సులో కిటికి ప్రక్కన కూర్చొని చూడొచ్చు... ఇది నా ప్లాన్.

పోయిన వారం తిరుపతి కి వెళ్ళాం. పెళ్ళి కాని ప్రసాదు లా మిగిలిపోతాడు అనుకున్న మావాడు పెళ్ళైన ప్రసాదు లా మారుతున్న శుభసందర్భంలో మేమంతా వాడి పెళ్ళికి తిరుపతి కి వెళ్ళాలి అని నిర్ణయించుకున్నాం. మొత్తం 7 మందిమి తలా ఒక్కో సోపు అరగదీసి, 2 tube ల FAIR & LOVELY మొహానికి అద్దేసి, 1 PARKE AVENUE అయిపోజేసి మేమే పెళ్ళి కోడుకు ల్లా బయలు దేరి మెజస్టిక్ కి చేరుకున్నం. ఏందుకంటారా ఎవరైన అమ్మయిలు బస్ లో వస్తే ఝలక్ ఇద్దాం అని .

మెజస్టిక్ కి వస్తే ఆ టైం కి రేడీ గా 2 బస్ లు ఉన్నాయి. ఒకటి ఏ.పి.ఎస్.ఆర్.టి.సి ఇంకోటి కె.ఎస్. ఆర్.టి.సి. నాలోని ఏ.పి.ఎస్.ఆర్.టి.సి అభిమాని నిద్రలేచి జై అన్నాడు. కె.ఎస్. ఆర్.టి.సి. కి వెళ్దాం, త్వరగా వెళ్ళ్తుంది అన్న మా హరి గాడిని హడలు కొట్టించి మరి ఏ.పి.ఎస్.ఆర్.టి.సి లోకి ఎక్కించా. కె.ఎస్. ఆర్.టి.సి. డ్రైవర్ నా వైపు అదోలా చుశాడు. జాలి , దయ, కరుణ ఇంకా రకరకాల భావాలు ఇలా కనిపించి అలా మాయం అయ్యాయి. అయిన నేను పట్టించుకోలేదు. ఏ.పి.ఎస్.ఆర్.టి.సి గురించి మా వాళ్ళ కు ఒక లెక్చర్ ఇచ్చా. ఏ.పి.ఎస్.ఆర్.టి.సి డ్రైవర్ నా వైపు ప్రశంస పూర్వకంగా చుశాడు. తరువాత బస్ స్టార్ట్ చేశాడు. బస్ సిటి దాటింది. ఇక చూడు డ్రైవర్ అన్న రెచ్చిపోతాడు అన్నా. మా వాళ్ళు నా వైపు అదోరకంగా చూశారు. నేను గట్టిగా తొక్కన్నా తొక్కు అని అరిచా. డ్రైవర్ తొక్కాడు. అప్పటి వరకు గంటకు 20 కి.మి స్పీడ్ తో పోతున్న బస్ భీకరమైన వేగం పుంజు కుంది. అంటే గంటకు 30 కి.మి వాయు వేగంతో తిరుపతి వైపు దూసుకవెళ్ళడం ప్రారంభించింది. అంతే నేను నా ఫ్రెండ్స్ వైపు చూసి నారాయణ మూర్తి లెవల్ లో " బస్ మనది రా.. సీటు మనదిరా...ఆర్.టి.సి మనదిరా మద్య కె.ఎస్.ఆర్.టి.సి ఏందిరా వాడి స్పీడ్ ఏందిరా " అని పాటందుకున్నా. ఇంతలో కిటికిలో నుంచి చూస్తే సైకిల్ మీద త్రిబుల్స్ వెళ్తున్న వాడు మా బస్ ని ఓవర్ టేక్ చేస్తూ కనిపించాడు. అంతే నా లోని నారాయణ మూర్తి తెర చాటుకి వెళ్ళాడు. నా ఫ్రెండ్స్ తిట్ల దండకం ప్రారంభించారు.

వేగంగా మా బస్ వెల్తోంది మేం బస్ ఎక్కి 3 గంటలు అయ్యింది. వచ్చిన దూరం మాత్రం 70 కి.మి. ఆ లెక్కన ఇంకో 6 గంటలకు కాని మేము తిరుపతి చేరుకోలేం. బస్సులు, కార్లు, లారిలు, స్కూటర్లు అన్ని మా బస్ ని ఓవర్ టేక్ చేస్తున్నాయి. అంతే మా వాళ్ళు ఒక్కోటి ఓవర్ టేక్ చేసినప్పుడు అంత ఒక్కో తన్ను తన్నడం ప్రారంభించారు. ఇంతకన్న ఘోరం వాళ్ళు ఆర్.టి.సి. ని తిట్టటం స్టార్ట్ చేసారు. వాళ్ళకి మిగిలిన ప్యాసింజర్స్ తోడయ్యారు. ఏ.పి.ఎస్.ఆర్.టి.సి కి జరుగుతున్న అవమానం తట్టుకోలేక నేను ఒక LAYS packet తిని , ఒక PEPSI తాగి ఆత్మ హత్యా ప్రయత్నం చేసా చావు రాలేదు కాని నిద్ర వచ్చింది. గట్టిగా చప్పట్లు, కేకలు విని నిద్ర లేచి చూస్తే మా బస్ ఒక ఎద్దుల బండిని ఓవర్ టేక్ చేసింది. ఆ ఆనందం తట్టుకోలేక మా వాళ్ళు పెప్సీ పొంగించారు. మా బస్ డ్రైవర్ ఒలింపిక్స్ లో గోల్డ్ మెడల్ తెచ్చిన బింద్రా లా ఫోజు కొట్టాడు. ఇంతలో బస్ హోటల్ దగ్గర ఆపారు. 100 కి.మి దూరాన్ని 5 గంటలు ప్రయాణం చేసిన మేము బంగ్లాదేశ్ నుంచి వచ్చిన కాందిశీకుల లా హోటల్ లో దూరి తినడం ప్రారంభించాము. హోటల్ వాడు పెట్టిన 2 రబ్బరు ముక్కలు @ చపాతీలలొ ఒకటి నమిలి 25 చెల్లించుకొని బస్ లోకి వచ్చి పడ్డాను. అంతలో మేము మెజస్టిక్ లో చూసిన కె.ఎస్.ఆర్.టి.సి బస్ వచ్చింది. నాకు ఉత్సాహం పొంగి, చూడండ్రా ఇప్పుడూ వచ్చాడు వాడు మనోడే బెటర్ అన్న మా వాళ్ళు చితకోట్టి బోర్డ్ చూపించారు అది తిరుపతి వెళ్ళి రిటర్న్ బెంగళూరు వస్తోంది. అమ్మనీ.. అనుకోవడం నా వంతు అయ్యింది.

డ్రైవర్ వచ్చాడు బస్ స్టార్ట్ చేశాడు. ఇంతకు ముందు 30 కి.మి వెళ్తున్న వాడు 20 కి.మి వచ్చాడు ఏంది కథ అని వెళ్ళి చూస్తే డ్రైవర్ నిద్ర పోతూ అప్పుడప్పుడు కళ్ళు తెరిచి చూస్తూ డ్రైవ్ చేస్తున్నాడు. ఇక డ్రైవర్ కు డిస్ట్రబెన్స్ చెయ్య కూడదు అని డిసైడయ్యి సీట్లో కూచొని మోబైల్ లో " అంతా భ్రాంతియేనా జీవితానా వెలుగు ...", అని పాట వింటూ ఉండి పోయా. మా వాళ్ళు పెళ్ళికి వెళ్దాం అనుకుంటే పురుడు కి వెళ్ళేట్టు ఉన్నాం అని తిట్టు కుంటున్నారు. ఇంతలో తిరుపతి వచింది, నా ప్రాణం కూడ లేచి వచ్చింది. 8 గంటల సుదీర్ఘ ప్రయాణం తరువాత మా మజిలీ చేరుకున్నాం. ఒకేరోజు మార్నిగ్ షో ఒక్క మగాడు, మ్యాట్నీ మృగరాజు, ఫస్ట్ షో ఎదురులేని మనిషి , సెకండ్ షో నరసిం హుడు చూపిస్తే థియేటర్ లో నుంచి బయటికి ఎలా జనం పారిపోతారో అలా మేము పరిగెత్తి రూం చేరుకున్నాం.

పెళ్ళి చూసుకున్న తరువాత తిరుపతి బస్టేండ్ కు చేరుకున్నాం. అక్కడ మళ్ళీ రెండు బస్ లు ఉన్నాయి ఒకటి ఏ.పి.ఎస్.ఆర్.టి.సి ఇంకోటి కె.ఎస్.ఆర్.టి.సి. నేను జై బోలో ఏ.పి ...అనేలోపలే నన్ను మా వాళ్ళు కె.ఎస్.ఆర్.టి.సి. లోకి తీసుకెళ్ళి సీట్ కిందకు తోసి (పారిపోయి ఏ.పి.ఎస్.ఆర్.టి.సి ఎక్కుతానేమో అని ) సీట్ పైన 6 సీట్ కింద ఒకటి మొత్తం 7 టికెట్స్ అని చెప్పి తీసేసుకున్నరు. ఆ విదంగా నేను బెంగళూర్ చేరడం ఏ.పి.ఎస్.ఆర్.టి.సి 7 సీట్ల డబ్బు నష్టం రావడం జరిగింది.

అన్నట్టు చెప్పడం మరిచా చిన్నప్పుడు A.P.S.R.T.C అంటే మేము ఏమి చెప్పేవాళ్ళం అంటే
ఆగితే పోదు(A.P), సమయానికి రాదు(S.R), టైం ఎంతపడుతుందో చెప్పలేం(T.C) .

వీటికి అర్థం ఇదేనా వి " నాయకా " !

2008-10-20T07:47:00.000-07:00

అందరికీ న్యాయం జరగలేదు. పార్టీ అధిష్టానం దృష్టికి తీసుకెళ్తా, వి.హనుమంత రావు.

అందరికి న్యాయం సంగతి దేవుడెరుగు. నీ సంగతి తేల్చుముందు. సూర్యుడి చుట్టూ భూమిలా 4 ఏళ్ళు అధిష్టానం చుట్టూ తిరిగినా నీకు మంత్రి పదవి రాక పాయే. పాపం శని అడ్డు పడ్డట్టుంది. ఇకనైన గంతులు ఆపవయ్యా హనుమంతు.

నేనడుగుతున్నా, నా ఇంటికి వెళ్ళకుండా నన్నెవరైన ఆపగలరా ! ఎవ్వరు ఆపలేరు ! సోనియా (రాయ్ బరెలీ ర్యాలి నేపథ్యంలో )

మేము అనేది కూడా అదే. ఇటలీకి సారి ఇంటికి వెళ్ళవమ్మా.. వెళ్ళు..వెళ్ళూ..

ప్రజల ఆస్తులు మింగలేను, చిరు.

ఇక్కడేం మిగిలింది అని మింగడానికి. మింగింది అరగక చస్తూంటే మీరు మరీను !

చిరు INCOME TAX కట్టాడా ! ఏ సినిమాకు ఏంత తీసుకున్నాడు చెప్పాలి, రఘువీరా.

అయ్యా ! INCOME TAX చుట్టూ తిరగలేక (తిప్పాక) కృష్ణా మీ చుట్టు తిరుగు తున్నాడు అది చాలదా!

ఉత్త ఆంధ్రా గా మారిందా ! ఏ రంగంలో మారిందో అవగాహనతో మట్లాడాలి, బొత్సా.

అవగాహన లేదు కాబట్టే బతికావు. అవగాహనతో వోక్స్ గురించి అడిగితే ఏం చెప్తావు చెప్పు సత్తెన్నా !

ప్రజారాజ్యం విధానాలు ప్రకటించాలి, రాఘవులు

9 నెలలు శాస్త్రీయంగా, అశాస్త్రీయంగా శోధించి సాధించింది 9 విధానాలు. అందులో రాజశేఖరుడు, చంద్రబాబు చెరో 4 హైజాక్ చేశారు. ఇక మిగిలింది 1 అది కూడా ఒక ఫైల్ లో రాసి పెట్టి ఉంటే ఆ ఫైల్ కూడా పాయె ! ఇక నీకేం చెప్పేది రాఘవయ్యా !! అర్థం చేసుకోరూ !! అయినా సైకిల్ ఎక్కేవాడివి టైర్ లో గాలి ఉందో లేదో, పంక్చర్ అయ్యిందో ఏమో చూస్కో ముందు.

చిరు 2 1/2 సంవత్సరాలు, బాబు 2 1/2 సంవత్సరాలు ముఖ్యమంత్రి గా ఉండాలి, నారాయణ .

ఇదేంటి గోయిందా సారి నారాయణ ఇలా అనేశావు. 2 ఏళ్ళు చిరు, 2 ఏళ్ళు బాబు, 1 సంవత్సరం రాజశేఖరుడు ముఖ్యమంత్రులుగా ఉంటారు. ఈ 5 సంవత్సరాలు నువ్వే ఉపముఖ్యమంత్రి , ఇది ఏలా ఉంది గోయిందా సారి నారాయణ.

బాక్స్ బద్దలైపోద్ది.

2008-10-03T05:21:00.000-07:00

కపిల్ కనుమరుగవుతూ, సచిన్ వెలుగులోకి వస్తూ ఇద్దరూ కలిసి BOOST IS SECRET OF OUR ENERGY అంటున్న రోజులు అవి. నేను చేత్తో bat పట్టుకొని ఇంట్లో బల్బులూ, అద్దాలు విరగొడ్తూంటే మా అమ్మ నా వీపు విమానం మోత మోగిస్తున్న రోజులు కూడా అవే. నాకు అప్పుడు 2 విషయాలు మాత్రం తెలిసేవి.,

1. క్రికెట్ చూడటం (టి.వి)
2.క్రికెట్ ఆడటం.
ఒకొక్కప్పుడు రెండూ కలిపి కూడా చేసేవాడిని. ఆ ప్రయత్నంలోనే బల్బులు, అద్దాలు విరిగేవి దాని తరువాత మా ఇంట్లో బెత్తాలు కూడా విరిగిపోయేవి. అప్పట్లో నా దృష్టిలో క్రికెట్ చూడటం భోగం, క్రికెట్ ఆడటం యోగం, క్రికెట్ ఆడలేకపోవటం రోగం. ఆ రేంజ్ లో వుండేది నా ఆలోచనలు.

ఎక్కువ క్రికెట్ ఆడుతూ, తక్కువ క్రికెట్ చూస్తూ, అతి తక్కువగా చదువుతూ 8 పూర్తి చేసి 9 కి వెళ్ళా. 9 కి కొత్త స్కూల్ కి మారాను. మా క్లాస్ పక్కనే 10 క్లాస్ ఉండేది. ఒకరోజు ఉల్లసంగా.. ఉత్సాహంగా క్లాస్కు వెళ్తున్న నాకు గుండె ఝల్లుమంది. కారణం 10 క్లాస్ లో కి నోట్ బుక్ తో వెళ్తున్న అమ్మాయి. అప్పటినుంచే ఆ అమ్మాయిని లవ్ చెయ్యడం స్టార్ట్ చేశా. LOVE AT FIRST SIGHT అన్న మాట. అమ్మాయి పేరు వెంకట లక్ష్మి . వెంకట లక్ష్మి మీద ఎన్నో కవితలు రాసా. ఇప్పట్లో లా అప్పుడు మాకు బుజ్జిగాడు, గంగోత్రి, నువ్వు- నేను సినిమాలు రాలేదు. కావున నాకు అప్పుడు అంతగా ప్రేమోదయం ( జ్ఞానోదయం లా ) కలగలేదు. లేదంటేనా నేను , వెంకట లక్ష్మి కలిసి ఎంచక్కా ఒక ఆవు పట్టు కొని అడవిలోకి పోయి పాలు పిండుకుంటూ... నీకు నేను నాకు నువ్వు ఒకరికొకరం నువ్వు నేను అని సింగే వాళ్ళం. అలాకాదు అంటే నేను కనీసం ఏ చెన్నైకో పారిపోయి 10 సంవత్సరాల తరువాత వచ్చి వెంకట లక్ష్మి I LOVE YOU అనేవాడిని. కాని అలా జరగ లేదు. తేజ, పూరి ఇంకా అసిస్టెంట్స్ గానే ఉండేవాళ్ళు. డైరెక్టర్స్ కాలేదు. డైరెక్టర్ అయిన రాఘవేంద్రుడు కూడా దీప్తీ భట్నాగర్ బొడ్డు కింద మచ్చ చూపిస్తూ "సందడి" చేస్తున్నాడు కాని నా లాంటి ప్రేమికుల కోసం గంగోత్రి అప్పట్లో తియ్యలేదు. ఏంచేద్దాం దేవుడు కరుణించలేదు.

ఎవరు ఏమి తీసిన తీయక పోయిన నాలో ప్రేమికుడు ఊరుకోడు కదా !. వెంకట లక్ష్మి కోసం నేను ఒక పాట పాడేవాడిని. అందమైన ప్రేమ రాణి లేత బుగ్గ పై చిన్న మొటిమ కూడ ముత్యమేలే.. అని తెగ పాడేవాడిని. సారి అరిచేవాడిని. అందులో పీచుమిఠాయి అర్థరూపాయి నువ్వు కొరికి ఇస్తే దాని విలువ లక్ష రూపాయలు. నాకు తెగ నచ్చింది. ఒక రోజు స్కూల్ ముందు పుల్ల ఐస్ బండి కనపడింది. అంతలో స్కూల్ కు వస్తున్న వెంకట లక్ష్మి కనపడింది. నాకు ప్రేమోదయం కలిగింది. పుల్ల ఐస్ అయితే ఏమి, పీచు మిఠాయి అయితే ఏమి అని పుల్ల ఐస్ కొని వెంకట లక్ష్మి కి ఇచ్చి ఒక సారి కొరికి ఇవ్వవా ప్లీజ్ అన్నా ! ఇంతలో మా లెక్కల్ అయ్యోరు చూశారు. చూస్తే చూశాడు గొట్టం గోవింద అనుకున్నా. కాని ఆయన్ని చూసి వెంకట లక్ష్మి తుర్రుమంది నా గుండె కలుక్కు మంది.

నేను క్లాస్ లోకి వెళ్ళా మా లెక్కలోడు వచ్చాడు, నన్ను లేపి బాగా MAN HANDLING చేసాడు. బయటకు చెప్పుకోలేని చోటంత చావ బాదాడు. ప్రేమకు వయస్సు అడ్డంకా చెప్పండి. అకారణంగా కొట్టాడు. నన్ను 9 ఎక్కం అడిగి కొట్టి ఉంటే నేను బాధ పడేవాడిని కాదు. ఎందుకంటే నాకు 9 వ క్లాస్ కి వచ్చినా 9 వ ఎక్కం రాదు మరి !!. కాని అలా జరగ లేదు. నా ఒంటికంటే కూడా నా మనస్సుకు తగిలిన గాయం పెద్దది. నాకు వెంకట లక్ష్మి కి మధ్య ఈ డుబుకు గోవిందం ఎవరు అని. ఆయన నా గుండె మీద కొట్టాడు. నా హృదయం లో నిదురించే చెలి కోసం ఒక పుల్ల ఐస్ కొనడం తప్పా అధ్యక్షా అని నేను ప్రశ్నిస్తున్నా. మా లెక్కలోడి దెబ్బలకు , నేను అరిచిన అరుపులకు పాపం వెంకట లక్ష్మి ఎంత బాధ పడిందో అని నా బాధంతా. ఆ రోజు నేను ఒక నిర్ణయం తీసుకున్నా మా లెక్కలోడికి బొంద పెట్టాలి అని. కాంగ్రెస్ కు బొంద పెట్టడానికి కె.సి.ఆర్ లా నేను ఎదురు చూస్తున్నా.

ఈ సారి దేవుడు కరుణించాడు. నాకు అవకాశం ఇచ్చాడు. మా స్కూల్ లొ annual games స్టార్ట్ చేశారు. మాకు ఇంకో క్లాస్కు క్రికెట్ MATCH పెట్టారు. నేను 9 B టీం కి CAPTAIN. అదొక పండగ రోజు నాకు. అదృష్ట దేవత నా తలుపు తట్టిన రోజు, దురదృష్ట దేవత మా అయ్యోరి తలుపు తట్టిన రోజు కూడా అదే. మేము ప్రాక్టీస్ చేస్తుంటే వచ్చి నాకు ఒక ఓవర్ వెయ్యండ్రా అన్నాడు. నా చేతిలో బాల్ ఆయన చేతిలో బ్యాట్. నా bowling మీద అపనమ్మకమో లేక ఆయన batting మీద అంత నమ్మకమో నాకు తెలీదు కాని నాకు బంపర్ ఆఫర్ ఇచ్చేశాడు. ఇంత సదావకాశం నేను వదులు కుంటానా వదిలితే నేను చైతు గాడు ఎల అవుతాను. మామూలుగా 11 ఫీట్ run up తీసుకుని బౌలింగ్ వేసే నేను ఆ రొజు boundary నుంచి పరిగెట్టడం మొదలెట్టా. అయిన మా అయ్యొరికి బల్బు వెలగలేదు. మరి ఆయన తల మీద దరిద్రం బ్రేక్ డేన్స్ చేస్తోంది రా.. రా.. సరసకు రా.. రా అని ... నాకు అయ్యొరి స్టంప్స్ కనపడలేదు. కాళ్ళు మాత్రం కపడుతున్నాయి. నా చేతిలో బాల్ ఆయాన కాళ్ళు....నా చేతిలో బాల్ ఆయన కాళ్ళు .. చేతిలో బాల్ ఆయన కాళ్ళు ..బాల్ ..కాళ్ళు ...బాల్ కాళ్ళు కట్ చేస్తే ...అబ్బా గావు కేక.

నేను కసి దీర వేసిన బాల్ ఆయన ముందు పిచ్ పడి " ఎక్కడ తగలాలో అక్కడే తగిలింది" . అబ్బా అని ఆయన అరవడం , నా మనసు హమ్మయ్యా అనడం వెంటనే జరిగిపోయాయి. బహుసా నా హమ్మయ్యా ఆయనకు కూడా వినిపించింది అనుకుంటా. లేకపోతే నా ప్రేమ జ్యోతిని ఆర్పేస్తాడా !

క్రికెట్ వీర లేవరా దీక్ష బూని సాగరా ....
ప్రేమ వ్యతిరేఖుల పీచమనచరా.....

కల కానిది...

2008-09-11T06:06:00.000-07:00

ఈ రోజు ఉదయం లేచి ఈనాడు చూసి అదిరిపడ్డాను. ఏం చెయ్యాలో పాలుపోలేదు . దిక్కు తోచలేదు. నన్ను నేను గిల్లుకున్నా. పక్కింటి ఆంటిని, ఎదురింటి అమ్మాయిని కూడా గిల్లా. వాళ్ళ దగ్గర తిట్లు,తన్నులు తిన్నాను అనుకోండి అది వేరే విషయం. ఒకటికి పది సార్లు ఆ వార్త చదివా. ఇలా కాదు అని పోయి వార్త, సాక్షి మరియు ఆంధ్రజ్యోతి అన్ని తెచ్చి చదివా. అన్ని అలాగే రాశారు. బెంగళూరు ఎడిషన్స్ తప్పో ఏమొ అనుకొని అన్ని పేపర్ ల నెట్ ఎడిషన్స్ చదివా అన్ని అలాగే ఉన్నాయి. ఇంతకీ ఆ వార్త ఏంటి అంటే ....

ఆంధ్రావనిలో ఎన్నికలు జరిగాయి . మెజార్టీ ఎవరికీ రాలేదు. దాంతో సంకీర్ణం ఏర్పడింది. ఎలాంటి సంకీర్ణం అంటే ...

1.వ్యవసాయ మరియు ఇడుపులపాయ, కడప శాఖ మంత్రి గా వై.యస్ . ఆర్
2. ఐ.టి , సంస్కరణలు మరియు మూడోకూటమి వ్యవహారాల శాఖ మంత్రి గా నారా చంద్రబాబు
3.యువజన వ్యవహారాలు మరియు మార్పు శాఖ మంత్రిగా చిరు
4.బోనాలు,జాతరలు మరియు లేఖలు శాఖ మంత్రిగా బండారు దత్తాత్రేయ
5.రవాణా శాఖ మంత్రిగా కె.సి.ఆర్.
6.భూపోరాటాలు మరియు చికెన్ శాఖ మంత్రిగా నారాయణ
7.సెజ్ లు మరియు లౌకిక వ్యవహారాల శాఖ మంత్రిగా రాఘవులు
8. ఆత్మాభిమానం మరియు మనోభావాలు శాఖ మంత్రిగా మంద క్రిష్ట్ణ
9. శిశు సంక్షేమం మరియు క్షమాపణ శాఖ మంత్రిగా శ్రీమతి జీవిత
10. సినిమాటోగ్రఫీ మరియు లెజండ్రీ శాఖ మంత్రిగా మోహన్ బాబు
11.అసమ్మతి మరియు వ్యంగ్యచిత్ర శాఖల మంత్రిగా దాసరి నారాయణ రావు
12. అవినీతి(వాసన) మరియు రామోజీ వ్యవహారాల శాఖ మంత్రిగా ఉండవల్లి అరుణ్ కుమార్
13. దేవాదాయ మరియు తిట్లు , కోయడాలు మంత్రులుగా గంగాభవాని మరియు నన్నపనేని రాజ కుమారి(సంయుక్తంగా)
14. డీపెప్ మరియు 'సరళ ' వ్యాపార వ్యవహారాల శాఖ మంత్రిగా సూరీడు
15. పోర్టులు మరియు వోక్స్ వాగన్ వ్యవహారాల మంత్రిగా బొత్సా సత్యనారాయణ
16. ఎక్సైజ్ మరియు బియ్యపు శాఖ మంత్రిగా నాగం జనార్దన రెడ్డి
17.పశుసంవర్దక మరియు ఆశుకవిత్వ శాఖ మంత్రిగా మారెప్ప
18.ప్రభుత్వ అధికారుల, ఆస్తుల మరియు ఆస్పత్రుల పైన దాడులు మరియు ప్రతిదాడుల శాఖ మంత్రిగా అక్బరుద్దిన్ ఒవైసి
19. బి.సి.సంక్షేమం మరియు తెలంగాణ శాఖ మంత్రిగా దేవేందర్ గౌడ్
20. పరిశ్రమలు మరియు రాయలసీమ వ్యవహారాల శాఖ మంత్రిగా టి.జి. వెంకటేష్
21.రాహుల్,ప్రియాంక మరియు జగన్ వ్యవహారాల శాఖ మంత్రిగా దానం నాగేందర్ ప్రమాణ స్వీకారం చేశారు. వీరిచేత గవర్నర్ ఎం.సత్యనారాయణ రావు గారు ప్రమాణ స్వీకారం చేయించారు. ఈకార్యక్రమంలో ప్రతిపక్షనేత మరియు లోక్ సత్తా అధినేత జయప్రకాష్ గారు పాల్గొన్నారు.

NOTE: సంక్షిప్త సందేశాలు మరియు వ్యాఖ్యల్ని పరిశీలించి, మేఘమదనం మరియు మేథో మదనం జరిపి, వివిధ వర్గాలనుంచి INPUTS తీసుకొని, శాస్త్రీయంగా మరియు అశాస్త్రీయంగా పరిశోధనలు జరిపి సరైన సమయంలో సరైన నిర్ణయంగా ప్రజాభీష్టం మేరకు ముఖ్యమంత్రి అభ్యర్థిని ప్రకటించడం జరుగుతుంది.

(ఇది నాకు వచ్చిన కల ఎవరి మనోభావాలు దెబ్బ తీయడానికి బ్లాగలేదు)

బాల్య స్మృతులు

2008-09-04T04:55:00.000-07:00

కాలమా! నీ గమనంతో
తీపిస్మృతుల బాల్యాన్ని
దూరం చేశావు.
ఈత నేర్పిన సరదాలు
ఎగరేసిన గాలిపటాలు
ఇసుకలో కట్టిన గోపురాలు
కాలువల్లో వదలిన
కాగితం పడవలు
వానతో పోటి పడి
పరిగెత్తిన తీపి గుర్తులు
ఎన్నో జ్ఞాపకాలు ...
మరెన్నో అనుభూతులు.
అన్నింటిని దూరం చేశావు.
కాని...
వాటి తడిని మాత్రం
చెరగని సిరాతో
మనసు పుటలపై నిక్షిప్తం చేశావు.

నా బ్లాగుకు వందరోజులోచ్.

2008-09-01T04:56:00.000-07:00

నా బ్లాగు శతదినోత్సవం జరుపుకుంటోంది. 10 టపాలతో 500 పైగా సందర్శకులతో 100 రోజులు పూర్తిచేసుకుంది. ఈసందర్భంగా నా బ్లాగుకు ఒక డిజిటల్ బ్యానర్ పెట్టాలి(ఎక్కడ పెట్టాలి చెప్మా ?). ఎలాగు మన 'నా గోల (శర్మా)' గారు ఒక డిజిటల్ ప్రింట్ కంపెని పెట్టాలి అని అనుకుంటున్నారు. కావున నేను ఒకటి ఎంచక్కా రాయించుకొని పెట్టేసుకుంటా.

ఏంటి తొక్కలో రాసింది 10 టపాలు, చుసింది 500 మంది అంతలోనే ఇంత సంబడం అంటారా? ఏం చెద్దాం లెండి.. అసలు రాయగలన(బ్లాగగలన) అనుకున్నా! ఏదొ రాస్తున్నా(బ్లాగుతున్నా అని నా ఫీలింగ్ బాబ్బాబు పుణ్యం ఉంటుంది బాలేదు నా రాతలు అనకండి). మరి కవి(పి)త్వం కూడా రాసా(కొన్ని నాకే నచ్చలేదు అది ప్రస్తుతం అప్రస్తుతం అనుకోండి).

నా బ్లాగు చుసిన మిత్రులకు, వ్యాఖ్యానించిన శ్రేయొభిలాషులకు అందరికి కృతజ్ఞతలు.

ఫ్లాప్ సినిమాను కూడా మన దర్శక,నిర్మాతలు,నటీనటులు ఎల సూపర్ డూపర్ హిట్ అంటూ బల్లితెర పైన సారి బుల్లితెర పైన ఇంటర్వ్యూలు ఇస్తారో అలా నా బ్లాగు హిట్ అన్న(నా)మాట. మరి నా తుంటర్వ్యూ సారి ఇంటర్వ్యూ ఎవరు తీసుకుంటారు చెప్మా! ఈ మహదావకాశం ఎవరికి ఇద్దాం....

మన(భారత)రత్నాలు

2008-08-30T07:36:00.000-07:00

భారత అత్యున్నత పురస్కారం "భారత రత్న" గ్రహీతలను ఒక సారి పరిశీలిస్తే, నాకు కొన్ని అనుమానాలు వచ్చాయి. వాటి నివృతి కోసం ఈ టపా రాస్తున్నాను. దయచేసి బ్లాగరులు నా అనుమానాలు సమంజసమా ! కాదా అని తెలియచేయగలరు.

నెహ్రు గారికి 1955 లో భారతరత్న ఇవ్వబడినది(తీసుకోబడింది) మరి భారత బిస్మార్క్, ఉక్కుమనిషి సర్దార్ వల్లభాయ్ పటేల్ గారికేమో 1991 లో. ఇందిరా గాంది కి 1971, మరి అంబేద్కర్ గారికేమో 1990 లో,రాజివుడికెమో 1991 లో. 1971 లో ఇందిర, 1975 లో వి.వి.గిరి కి ఇచ్చినవారికి సర్దార్ మరియు అంబేద్కర్ ఎందుకు గుర్తుకు రాలేదు అని నా అనుమానం. రాజ్యాంగ కర్త కన్నా గిరి గారి సేవలు ఎక్కువ? ( గిరి గారి గురించి నాకు పెద్దగ తెలియదు కావున తప్పు అయితె క్షమించగలరు). లేదా 90' ల వరకు సర్దార్, అంబేద్కర్ సేవలు మనం గుర్తించలేక పొయామా ?

ఎం.జి.ఆర్ కు 1988 మరణానంతరం ఇచ్చిన భారతరత్న పురస్కారం మరి మన ఎన్.టి.ఆర్ కు ఎందుకు ఇవ్వలేదు? అంటే ఎన్.టి.ఆర్ కు అర్హత లేదా? ఇద్దరు ప్రాంతీయ నేతలే కదా. ఎం.జి.ఆర్ నెహ్రు కుటుంబానికి దగ్గరి వాడు అన్న విషయం విదితమే. వీటి వెనుక బలమైన రాజకీయ కారణాలు ఉన్నాయి అన్నవి సుస్పష్టం. మరి "రత్నం" సంగతి ఇలా ఉంటే మరి "పద్మాల" సంగతో !!! ఇంతకీ నాకు కలిగిన అనుమానం ఏంటంటే.. ..భారతరత్న కు అర్హత ఏంటి?

1.దేశ సేవ
2.శాస్త్రసాంకేతిక రంగంలో సేవ
3.కళలు మరియు సమాజ సేవ
4.నెహ్రూ కుటుంబ సభ్యులుగా ఉండటం.
5.గాందీ పేరు కలిగి ఉండటం.
6.గాందీ కుటుంబానికి విశ్వాసనీయత కలిగి ఉండటం.
7.పైన పేర్కోన్న 4,5 మరియు 6 అర్హతలు కలగలపి ఉండటం.

బహుశ 7 వ అర్హతతో త్వరలో మరికొంత మంది "రత్నాలు" తెరపైకి వస్తారేమో! చూడాలి.

హింస

2008-08-29T01:18:00.000-07:00

మారణాయుధాలతో మాటలు,
బాంబులతో బాటలు,
అస్తిపంజరాలతో ఆటలు,
మతాల ముసుగులో
మానవతకు తిలోదకాలు,
హింసకు మార్గాలు
ఎన్నొ..ఎన్నెన్నొ !!!

ఆశలు--అంతస్తులు

2008-08-14T05:03:00.000-07:00

రోడ్డుకు తారు వేసే పని చాలా పకడ్బందీగా జరుగుతోంది. సుమారు యాభై మంది కూలీలు...యిద్దరు మేస్త్రీలు ఒక సూపర్ వైజర్. పనిబలే జోరుగా సాగిపోతున్నది. పైడితల్లి కూతురు నాలుగేళ్ళ గుంటది. సుమారు గంట సేపట్నుంచి మంచి నీళ్ళ కోసం యేడుస్తున్నది. అసలే వేసంగి. దానికి తోడు చుట్టు తారు కరిగిస్తున ఎర్రటి మంటలు , నల్లటి చిక్కటి పొగ. పాపం ఆ అమ్మాయి నీళ్ళ కోసం పడుతున్న యాతనచూసి తల్లి గుండె గుబ గుబ లాడిపోయింది. అయినా నిస్సహాయంగా చూస్తుండిపోయింది. పనిలో లీనమై. రెండు ఫర్లాంగుల దూరంలో చింతచెట్టుక్రిందున్న తమ తాత్కాలిక నివాసాలు వద్దకెల్లి నీళ్ళు తెస్తానని యెంతబ్రతిమాలుకున్నా మేస్త్రీబాబు వొప్పుకోలేదు. పాపం మేస్త్రీ బాబు మాత్రం యేంచేస్తాడు?. ఆయన హడావుడి ఆయనది. ఆయనపైన అధికారి సూపర్వైజర్. పైగా ఈరోజు స్పాటు ఇన్స్ పెక్సన్ కి పెద్ద ఇంజనీరు గార్ని తీసుకోస్తున్నారు కంట్రాక్టర్ గారు. ఇంజనీరు గారు ఫేమలీతో సహా వస్తున్నారు. అందుకే ఈ హడావిడి.
విజయవాడ నుండి అమరావతికి తుళ్ళూరు మీదుగా వేస్తున్న తారురోడ్డది. కంకర, తారు కలిపి రోడ్డుమీద పోసేముందు రోడ్డంతా బాగా పారతో చెక్కి రాళ్ళు చెత్తా ఏరి పారేసి చీపురతో వూడుస్తు పైడి తల్లికి మట్టిలో మిలమిల మెరుస్తూ అర్థ రూపాయి లాంటిది దొరికింది. పైడితల్లి కళ్ళు ఆశతో మిలమిల మెరిశాయి. ఇదిస్తేనన్నా మేస్త్రి కాసేపు తనకు పర్మిషన్ ఇస్తాడేమోనని. మేస్త్రి బాబుకి తెచ్చి ఇచ్చింది ఆ ఆలోచనతోటే పైడితల్లి. పర్మిషన్ అయితే ఇవ్వలేదు గాని పరిగెత్తుకెల్లి సూపర్ వైజర్ చేతుల్లొ పెట్టడు మేస్త్రిబాబు. తన నిజాయితిని గుర్తించి మరో పాతిక రూపాయల జీతం పెంచమని కాంట్రాక్ట్ర్ గారికి రికమండ్ చెస్తాడన్న కొండంత ఆశతో.
ఇంతలో రెండు కార్లు వచ్చి రోడ్డుప్రక్క చెట్టు క్రింద ఆగాయి, ఒకదాని వెనుక ఒకటిగా. కూలీలంత శ్రద్దగా తమ పనులలో తాము మరింతగా మునిగి పొయ్యారు. మొదటి కార్లొంచి కంట్రాక్టరు రాజారావు గారు దిగారు. రెండొ కార్లొంచి ఇంజనీరుగారు విలాసంగా ఎండకు విసుక్కుంటూ కారుదిగి అలా చూస్తూ వుండిపొయారు.
సూపర్వైజర్ గారు తప్పకుండా ఈసారి రాజారావు గారు తనకు కాంట్రాక్ట్ లో వాటా ఇస్తారన్న నమ్మకంతో ఆ బంగారు నాణేన్ని రావు గారి చేతిలో పెట్టారు. వాటా ఇస్తారో లేదో గాని ఇంకో రోడ్డు కాంట్రాక్టుని మరింత చీప్ గా కొట్టేయాలని. వొల్డ్ గోల్డ్ కాయిన్ సర్ మా వర్కర్స్ కి దొరికింది అని ఇంజనీరు గారి చేతిలో పెట్టారు రాజారావు గారు . ఏ శాతవాహనుల కాలం నాటిదో అయి వుంటుందనుకొన్న ఇంజనీరు గారి మస్తిష్కంలో మరో కాంట్రాక్ట్ గుర్తుకు రాలేదు కాని దాన్ని కరిగిస్తే వచ్చే డబ్బుతో రెండ్రోజులు మద్రాసులో ఎక్స్ ట్రాల్తో గడిపే మధుర క్షణాలు గుర్తుకొచ్చాయి. కారులో నుండి అంతా తిలకిస్తున్న అమ్మగారికి నైట్ క్లబ్ లో రహస్యంగా చుపే "బ్లూఫిల్మ్" ఒకటి కొనేయాలన్న కొరిక చెలరేగింది. .. ప్రక్కనే కూర్చొని వొళ్ళొ ఉన్న బోచ్చు కుక్క వొళ్ళంతా నిమురుతున్న అమ్మాయి గారికి ఎంచ్చక్క దాని అమ్మేసి బోయ్ ఫ్రెండ్తో బోంబేకి "జాలిట్రిప్" వేస్తే చాలా బావుంటుందన్న మెరుపు లాంటి ఆలోచన మెరిసింది.
ఇంతలో కంట్రాక్టర్ గారు తమ కార్లొంచి నాలుగు కొబ్బరి బోండాలు, బిస్కెట్లు, ఆపిల్స్ ఇంజానీరు గారికి వారి ఫ్యామిలీకి ఆఫర్ చేశరు. అమ్మాయి గారి ఒడిలో ఉన్న కుక్క గారిని కూడా మరిచి పోకుండా రావు గారు ఫ్లాస్క్ లో ఉన్న పాలును స్వయంగా తమచెతుల్తో అందించారు.
పైడితల్లి పుత్రికారత్నం కార్లోని వ్యక్తి కేసి గుడ్లప్పగించి చూస్తుండిపొయింది. దప్పిక ఎమైపొయిందొ తెలీదు ఆ క్షణం ఆ గుంటదానికి ఇంతలో ఇంజనీరుగారి అబ్బాయిగారు రెండుసార్లు కొరికి క్రింద పారేసిన ఆపిల్ పండుపై కళ్ళు పడ్డాయి. అది తింటే ఎలా ఉంటుందో.. .. దోసకాయలానా? మిరపకాయలానా ? కార్లో కుక్క తాగుతున్న పాలకేసి.....రోడ్డు ప్రక్క పడున్న ఆపిల్ కేసి చూపులు చూస్తూ మెల్ల మెల్ల గా అడుగులు వేసుకుంటూ కారు దగ్గరికి వస్తూన్న గుంటదాన్ని ఎలా పసి గట్టాడో గాని తుఫానులా దూసుక వచ్చిన మేస్త్రీ బాబు చేతనున్న స్కేలు కర్రతో గుంట దాని మాడు మీద రెండంటించాదు. గుంటదాని కళ్ళు బైర్లు కమ్మాయి. ఏడ్చేందుకు కంట్లో నీళ్ళు గోంతులో శక్తి ఎప్పుడొ ఖర్చయిపోయాయిమరి. పైడితల్లి శుభ్రంగా తుడిచి పెట్టిన రోడ్డు మీద మరింత దుమ్ము రేపుకుంటూ కదిలి పోయాయి రెండు కార్లు.
-----------------------------------------------------------------------------------------------
కథంబం అనే పుస్తకంలో అచ్చయిన కథ ఇది. కథంబం అనేది వివిద రచయితలు వ్రాసిన 24 కథల సంపుటి. ఈ పుస్తకం మే 1982 లో గుంటూరు సాహితి పబ్లికేషన్స్ ద్వారా ప్రచురితం అయినది సంపాదకులు బులుసు వెంకటేశ్వర రావు గారు.

ఇంటర్ చదివిన విధంబెట్టిదనిన ...

2008-07-18T04:22:00.000-07:00

శ్రీవిద్యా గారు అన్నమాట 'నేను ఇంటర్ చదివేటప్పుడు నేను ఇంటరే చదవాల్సి వచ్చేది' చదివిన తరువాత నేను కూడ నా ఇంటర్ ప్రస్థానం రాయలి అనిపించింది. కావున ఇక్కడ బ్లాగేసా...నేను ఇంటర్ చదివిన విధంబెట్టిదనిన ...

ఇంటర్ కు ముందు నేను కొంచెం చెప్పాలి. అంటే అది నా లెగ్ మహిమ. నన్ను మా నాన్న 3 క్లాస్ లో ఒక స్కూల్ లో చెర్చారు. అక్కడ 3 చించాను. వేసవి శెలవులు అయ్యక పొయిచూద్దునూ. అక్కడ స్కూల్ లేదు . కనీసం స్కూల్ వున్న ఆనవాలు కూడ లేదు. తరువాత నన్ను 7,8 ఒక స్కూల్ లో చదివించారు..నేను చదివాను. నేను 9 వచెటప్పటికి స్కూల్ పని గోవిందా.. అదేనండి స్కూల్ ఎత్తెసారు. సరె 9 కి ఇంకొ స్కూల్ 10 కి మరొకటి అలా అలా నేను నా హైస్కూల్ ముగించేసరికి మా వుళ్ళో స్కూళ్ళు అంత మాయం అయిపొయాయి. ఇక లాభం లేదు అని వున్న ఒక్క కాలెజ్ వాళ్ళు ఇంటర్ లొ నన్ను చెర్చుకోము అని నా గడ్డం పట్టి బ్రతిమలాడి పక్క వుళ్ళో చెరితే ఫీజ్ కుడ వాళ్ళె కడతాం అని ప్రతిపాదించారు. నేను వాళ్ళను ఇబ్బంది పెట్టడం ఇష్టం లేక చదువు మనేద్దాం అనుకున్నా. కాని మా నాన్న నన్ను తీసుకెళ్ళి పక్క ఉళ్ళో వున్న కాలెజ్ లో ఇంటర్ లో(బావి లో అని నా ఫీలింగ్) తొసేసారు. రోజు బస్ లో వెళ్ళిరావటం నా పని(చదవటం కాదు అని నా అభిప్రాయం).

నేను రోజు కాలెజ్ కి తక్కువ క్రికెట్ గ్రౌండ్ కు ఎక్కువ వెళ్ళేవాడిని. 2 నెలల తరువాత నాన్న నా గురించి కనుక్కుంటే మీవాడు Regularga Irregular అన్నారట. ఇలా అయితే లాభం లేదు వీడికి ఇంటర్ లో 1000 కి 1100 వస్తాయి మళ్ళి పేపర్ వాళ్ళ కు ఇంటర్వ్యులు మనం ఇవ్వలేము అని అనుకొని మా నాన్న నన్ను హాస్టల్ లొ చెర్చారు. నాకు తెలుగులో ఇంకా ఆంగ్లంలో నచ్చని పదాలు... వసతిగృహం మరియు హాస్టల్. కాని మా నాన్న చాలా మొండిఘటం. ఆయన వదల్లేదు.. నాకు తప్పలేదు. ఆ హస్టలో రోజుకు 30 గంటలు చదివించేవారు. నేను రోజుకు 12గం నిద్ర, 8గం క్రికెట్, 3 గం టీ.వీ చూసి 1 గం లో మిగిలిన పనులు చేసి ఇంక మిగిలుంటే ఆ టైంలో చదివేవాడిని. కాబట్టి నాకు ఆ హస్టల్ నచ్చలేదు. కాని అది మా నాన్నకు నచ్చింది ..కావున నేను అక్కడ వుండాల్సివచ్చింది. నన్ను వాళ్ళు పగలు,రాత్రి తేడ లేకుండ చదివించేయలి అని తెగ తాపత్రయపడేవాళ్ళు. నాకు వాళ్ళను నిరాశ పరచటం ఇష్టం లేకుండ చదువుతున్నట్టు నటిస్తుండేవాడిని. పరీక్షలు వచ్చాయి. వ్రాసాను. రిసల్ట్సు వచ్చాయి. ఎముంది చుడ్డానికి. నా బొంద. తెలుగులో 35 మిగిలిన అన్ని కలిపి 15 మొత్తం 50. నా అంచనా ప్రకారం 40 రావాలి కాని లెక్కలు పేపర్ లో (a+b)2,(a-b)2,a2-b2 రాసా బహుశ దాని దుష్ప్రభావం వలన నాకు ఈ పరిస్థితి అంటే 50 రావటం. ప్రిన్సిపాల్ వార్నింగ్ ఇచ్చాడు నా వల్ల కాలెజ్ కి చెడ్డ పేరు అని. ఆయనకు తెలియదు ఆరిపొయె దీపానికి వెలుగు ఎక్కువ అని. నేను చెప్పాలి అనుకున్నా కాని తినబోతు రుచి ఎందుకు అని ఆయనే తెలుసుకుంటాడులే అని వదిలేసా. ఇంతలొ ఒక విషాధ గాధ. ఇంకా మీకు తట్టలేదా.. అదేనండి నేను ఆ కాలెజ్ లో చేరి 1 సం. గడిచిందా కావున... ఇంకా అర్థం కాలేదా.. నా లెగ్ మహిమ ఫలితం కాలెజ్ మూసేసారు.

నాన్నారు కాలెజ్ వేటలొ పడ్డారు నేను క్రికెట్ లో పరుగుల వేటలొ పడ్డా. దొరక్కదొరక్క ఒక కాలెజ్ దొరికింది. నన్ను చేర్చుకున్నారు. ఆ ప్రిన్సిపాల్ రూల్స్ చెప్పాడు. నేను వింటున్నట్టు నటించా. మనసులొ అనుకున్నా నాకు సీటు ఇచి నీ సీటుకు ఎసురు తెచుకున్నవు కదా అని .. మళ్ళీమొదలు. హస్టల్. క్లాస్ కు లెక్కల మాస్టారు వచ్చాడు. నన్ను (a+b+c)2 సూత్రం అడిగాడు. నేను (a+b)2 వచ్చు అన్నా .. ఆయన చెయ్యి లేచింది నా గూబ గుయ్యిమంది. ఆయన నీ మొదటి సం. మార్క్స్ ఎంత అన్నాడు. 50 అన్న. నేను అడిగింది లెక్కల్లొ కాదు మొత్తం అన్నాడు. నేను చెప్పింది కుడా లెక్కల్లొ కాదు మొత్తం అన్నా. దెబ్బకు బెదిరిపొయాడు. ఇలాక్కుడ వస్తుందా అన్నాడు. అలాగే వచ్చింది అన్నా. నా మీద చెయ్యి ఎత్తి ఎంత తప్పు చేసాడొ అప్పుడు అర్థం అయింది ఆయనకు. నా మర్క్స్ చెప్పి అయనపై నా ప్రతీకారం తీర్చుకున్నా. అప్పటి నుండి ఆయన నా పైన శ్రద్ద చూపడం మొదలుపెట్టాడు. శ్రద్ద అనడం కన్నా టార్గెట్ చేసాడు అనడం కరెక్ట్. నా పేరు (a+b) గాడు గా మార్చి ముందు బెంచి లొ కుర్చొబెట్టాడు. బోర్ద్ లో స్టెప్ వెయ్యడం నన్ను ఒకటి పీకడం.. వెయ్యడం .. పీకడం ఇలా అ(వి)రగదీసాడు నన్ను .

ఇంతలో మా కాలెజ్ లో ఇంటర్ చదివేవాళ్ళకు సప్లిమెంటరి వచ్చంది. నాకు మా ఉళ్ళో క్రికెట్ గుర్తొచ్చింది. హస్టల్ లొ నేను మాయం అయ్యి గ్రౌండ్లో తేలా. కాని మా నాన్న నన్ను పట్టుకొచ్చి కాలెజ్ లొ తోసారు .. అది కూడా లెక్కలు మాస్టారి ముందు ఇక చూస్కొ నా సామి రంగా వాయించి వదిలాడు. అంతటితో వదలక కాలెజ్ గ్రౌండ్లో బెంచ్ వేసి దానిపైన నిలబెట్టాడు. ఇక చూస్కో బస్టేండ్ లో గాంది గారి విగ్రహం ల మా కాలెజ్ గ్రౌండ్ లొ నేను చెతిలొ పుస్తకంతో. నా ప్రిస్టేజి మొత్తం అటక ఎక్కించేసాడు. ఇక లాభం లేదు అనుకొని ఆ రోజు అనుకున్నా, ఇంటర్ లో నేను 60% తెచ్చుకోవాలి అని. అయిన 50 వచ్చినవాడికి ఒకొ దానిలొ 50 రావటం అంటే మాటలా కాని నేను గట్టిగా అనుకున్నా సాధించాలి అని.

రోజుకు 26 గం , గంటకు 70 ని, నిమిషానికి 80 సె. చోప్పున చదవడం మొదలెట్టేసా. పరీక్షలు వచ్చాయి, నేను రాసాను రిసల్ట్స్ వచ్చాయి నేను పాస్ అయ్యాను. పప్పు పాస్ హొగయా లెవెల్లో. భాషా లో రజని లా కాలెజ్ లో నా హీరోయిజం పెరిగిపొయింది. అలా అలా కాలం గడుస్తుంటే రెండో సం. పరీక్షలు వచ్చాయి నేను తెగ చదివేస్తున్న ఎంత చదివాను అంటే స్నానం చేసేటప్పుడు కూడా పుస్తకం పైన పాలిథిన్ కవర్ పెట్టి చదివేవాడిని. ఇంటర్ పుస్తకాలు అన్ని చదివి నేను చింపేస్తున్నాను అని మా హాస్టల్ వార్డన్ చెప్పగా మా నాన్నా తెగ హైరానా పడి కొత్త సెట్ పుస్తకాలు తెచ్చిచ్చారు. పరీక్షలు రాసా రిసల్ట్స్ వచ్చాయి. నాకు 82% వచ్చింది. ఇక చూస్కో ఎస్కోరా నా వాస్కోడిగామ గంతులే గతులు నేను కాదు.. మా లెక్కలు అయ్యొరు ఇంక మా నాన్న. పాస్ అయినందుకు మా నాన్న లెక్కల్లో కాలెజ్ ఫస్ట్ వచ్చినందుకు మా సారు గారు. నేను వాళ్ళ ఆనందానికి అడ్డం పడకుండా చివరిసారిగా మా కాలెజ్ ఒక సారి చూసుకున్నా. ఇది నా ఇంటర్ ప్రస్థానం. అన్నట్టు చెప్పడం మరిచా నేను ఇంటర్ ముగించి టి.సి తీసుకొని డిగ్రీలో చేరాక మా "ఇంటర్ కాలెజ్ " మూసివేయడం జరిగింది(మరి నా లెగ్ అంటే ఏటి అనుకున్నారు)..
పి.యెస్. మా లెక్కలు మాష్టారు గారి కి గురు పౌర్ణమి సందర్భంగా నమస్సులు. ఎప్పటికి ఆయనను మరిచి పోలేను.

దేవుడా...రక్షించు ..

2008-07-17T07:29:00.000-07:00

ప్రస్తుతం రాజకీయపరిస్ఠితులను చూస్తూంటే కోపంగాను, భయం గాను, విరక్తిగాను, జుగుప్సగాను,ఆశ్చర్యంగాను ఇంకా 'రకరకాలుగా ఉంది '. రాత్రి 'తిలక్ ' గారి అమృతం కురిసిన రాత్రి చదువుతుంటే దానిలొని ' "ప్రార్థన" కవిత లోని ఈ క్రింది పంక్తులు ఇక్కడ వ్రాయాలి అనిపించింది. ఇది సందర్భమో లెక అసందర్భమో నాకు తెలియదు. తిలక్ గారు ఇది 1963 లో వ్రాసారు అట మరి ఆయన ఏ పరిస్ఠితులలొ వ్రాసారో నాకు తెలియదు. ప్రస్తుతం ఇది అప్రస్తుతం అయితే మరి బ్లాగరులు క్షమించాలి .
దేవుడా
రక్షించు నా దేశాన్ని
పవిత్రులనుండి పతివ్రతలనుండి
పెద్దమనుషులనుండి పెద్దపులులనుండి
నీతుల రెండు నాల్కలు సాచి బుసలుకొట్టే
నిర్హేతుక కృపా సర్పాలనుండి
లక్షలాది దేవుళ్ళ నుండి వారి పూజారులనుండి
వారి వారి ప్రతినుధులనుండి
సిద్దాంత కేసరులనుండి సిద్దులనుండి
శ్రీ మన్మద్గుర పరంపరనుండి ...
ఇలా సాగుతుంది ఆ కవిత ఇందులొ ప్రతి పదము నేటితొ సరిపొతుంది అని నా భావన.

వర్షం లో నువ్వు

2008-06-27T05:19:00.000-07:00

చినుకు చినుకు గా
వాన పడుతూ ఉంటే
చిరు జల్లుల జడిలో
నువ్వు తడిచి పోతూంటే ..
ప్రతి చినుకూ నీ కోసమే అన్నట్టూ
నిన్ను తడిపేస్తూ ఉంటే
ఉరుములతో , మెరుపులతో,
ఇంద్రధనస్సు వెలుగులతో
ప్రకృతి నీకు స్వాగతం చెప్తూ ఉంటే
అడుగులో అడుగు వేస్తూ నువ్వు..
వర్షం లో తడుస్తూ నువ్వు!

నీ రూపం

2008-05-30T08:45:00.000-07:00

వరి పైరు పై వీచు
చిరుగాలి తరంగాల వరుసవలె
నా హ్రుదయం లో
పరుగులెడుతున్న వింతభావాలెన్నొ
నా ఈ ఆనందానికి కారణం..
పెదవులపై చిరునవ్వుతో
నా మదిలో మెదిలిన
నీ ప్రతిరూపం

నీ స్నేహం ...

2008-05-29T06:41:00.000-07:00

మనసు పొరలను తవ్వుతున్న కొద్ది
తీపి స్మ్రుతుల తడి తగులుతూనే ఉంది
ఊహలలొ ఎగిసే స్పందనలు
హ్రుదయాన్ని తాకుతున్నాయి...కాని
నీ స్నేహం మాత్రం
కాలంతొ కలసిపోయి
కల గా మారిపోయింది

భయం

2008-05-28T22:45:00.000-07:00

భయం భయం
ఆంతా భయం భయం
ఇన్ని భయాల మధ్య
బ్రతకడం ఎందుకు అనుకున్న
కాని చావంటె ఇంకా భయం
అందుకే బతుకుతున్న
ప్రతి క్షణం చస్తూ...
(రైతుల ఆత్మహత్యలు, ఉగ్రవాదులదాడులు నేపథ్యం లో ....)

ముందు మాట

2008-05-24T22:48:00.000-07:00

నేను చాలా రోజుల నుంచి చక్కటి,చిక్కటి తెలుగులో బ్లాగేయాలి అని అనుకుంటున్నా కాని కుదర్లేదు. ఇన్ని రోజుల తరువాత కాస్త సమయం(కాస్త కాదులెండి బొలెడు)దొరికింది. కాబట్టి ఇక మీదట చక చక బ్లాగబొతున్నానోచ్,దయచేసి నా భాషకు, శైలికి బయపడకండి. నేను మంచి టపాలు రాయడానికి కావలసిన సలహాలు, సూచనలు మీ విమర్శల ద్వార పొందగలను అని భావిస్తూ.........